“Greg?! Ano’ng ginagawa mo dito?” paangil ngunit pabulong niyang sambit.
Napatingala siya sa bintana ng kwarto ng kanyang mga magulang na nasa may tapat ng gate. Bagaman dinig niya ang pag-ugong ng aircon sa silid ay nag-aalala siya na baka maulinigan sa itaas ang pag-uusap nila ng kumpare.
“Mare, please… Pwede ka bang sumama sa’kin? Gusto lang sana kitang makausap.”
“Wala na tayong dapat pag-usapan, Greg! Saka paano mo nalamang nandito ako?” pagtataka ni Diane.
“Nadinig ko sa pag-uusap ni Pam at Dennis na nandito kayo ni JR… Pakiusap Diane… Wala naman akong balak na masama… Gusto lang kitang makausap para makahingi ng dispensa sa lahat.”
Matapos ang nangyari sa pagitan nila ni Diane noong nakaraan ay batid ni Greg na hindi na madaling mapabigay ang kumare. Sadyang pumapalag na ito. Kaya ang mahalaga ngayon ay mapasama niya muna si Diane. Bahala na kung paano niya ito didiskartehan pagkatapos.
Parang kinurot ang dibdib ni Diane nang matuklasang nag-uusap pa rin sila Dennis at Pam at ikinwento pa nito sa inaanak ang pag-alis nilang mag-ina sa kanilang bahay. Di tuloy niya maiwasang muling magduda na may namamagitan pa din sa magninong hanggang sa ngayon.
Lalong naguluhan ang kanyang isip. Ngunit mas natuon ang kanyang pansin sa kumpareng nagpupumilit na makausap siya sa kabila ng ilang ulit na niyang pagtatangkang layuan ito.
“Hindi pwede! Paalis ako Greg, may lakad ako.” sagot niya sa pag-asang maapaalis na niya ito.
“Oh edi dyan na lang tayo sa loob mag-usap, mabilis lang naman. Para madalaw ko din ang inaanak ko…”
Kilala naman ng mga magulang ni Diane si Greg at alam na malapit itong kaibigan ni Dennis. Kung tutuusin ay wala namang problema na dumalaw doon ang ninong ni JR. Ngunit dahil mayroon ding iniingatang lihim kaya’t hindi kumportable si Diane na patuluyin pa si Greg sa bahay ng mga magulang.
Akmang tutuloy na sa loob ng bakuran si Greg nang harangan ito ni Diane at itulak sa dibdib. Muling napatingala sa bintana sa itaas sa pangambang magising at sumilip ang kanyang mama o papa.
“No! Hindi pwede dito! Tsk sige, sige na… tara halika na nga.”
Sa takot na makatunog ang kanyang mga magulang sa namamagitan sa kanila ng kumpare ay napilitan si Diane na sumama na lang kay Greg. Maingat niyang inilapat at inilock ang gate at muling sumulyap sa bintana ng master’s bedroom sa itaas na nanatili namang nakasara ang mga kurtina.
Mabilis siyang lumakad palapit sa pick-up ni Greg. Sa pagmamadali niyang makasakay ay di na niya napansin ang pilyong ngisi na gumuhit sa labi ng kumpare.
Tahimik lamang sila habang bumabaybay sa kalsada. Nakakunot ang noo ni Diane at tila lumulutang ang isip habang nakatingin sa labas ng bintana.
Pasimple namang sumusulyap-sulyap si Greg sa kumare. Kahit naninibago siya sa gupit ng buhok nito na lampas lamang ng balikat ay lutang pa din ang angkin nitong ganda. Nakapatong ang dalang tote bag sa kandungan nito ngunit namamasdan pa din niya ang makinis nitong mga hita mula sa laylayan ng bestidang suot.
“Dito na lang tayo…” biglang wika ni Diane sabay turo sa papalapit na gasolinahan.
May sapat na distansya na iyon mula sa kanila at malabo nang may makita pa si Diane na kakilala. Pinili niyang doon na lang pahintuin si Greg upang madali siyang makahingi ng tulong sakali mang magtangka ito na may gawing hindi niya gusto.
Simpleng napaismid si Greg. Hindi man iyon ang kanyang plano ay wala na siyang nagawa kundi sumunod sa sinabi ng kumare. Mahirap namang ideretso niya agad at sapilitang dalhin ito sa condo dahil tiyak na mag-eeskandalo din ito.
Kailangan niya munang muling kunin ang tiwala ni Diane. Ipinihit niya ang manibela papasok sa gasolinahan at pumarada sa tapat ng convenience store na naroon.
Kakatwa para kay Diane na nasa ganoong lokasyon sila ni Greg. Tila nagbalik sa kanyang alaala ang unang pagkakataon na nagtaksil sila kay Dennis. Sa convenience store sa isang gasolinahan din siya inantay noon ni Greg na makalabas mula sa duty niya sa ospital.
Biglang naalala ni Diane ang kanyang lakad. Nangambang baka sa pagdating ng mga kaibigan ay malaman ng mga magulang na hindi niya kasama ang mga ito.
Agad siyang nagmessage na huwag na siyang daanan sa kanilang bahay. Balak niyang magdala na lang ng sariling sasakyan at sumunod na lamang sa okasyon matapos nilang mag-usap ni Greg.
“Oh, ano ba’ng pag-uusapan natin?” iritadong tanong niya sa kumpare.
Ramdam ni Greg sa boses ni Diane ang disgusto. Alam niyang mahihirapan siyang maisakatuparan ang kanyang binabalak ngunit kailangan pa rin niyang subukan.
“Teka… kamusta ba kayo ni JR? Bakit pala kayo umalis sa inyo?… Dahil ba sa nalaman ni Dennis?… Sinaktan ka ba niya?…” nag-aalalang tanong ni Greg.
Akmang hahaplusin niya ang pisngi ni Diane ngunit napabalikwas ito ng ilag.
“No. Hindi naman ako magagawang saktan ni Dennis… At least, not physically… pero–“
Di napigilan ni Diane na mapahagulgol nang maungkat ang tungkol sa away nilang mag-asawa. Sa loob kasi ng ilang buwan na nilang pagtitikisan ni Dennis na humantong na nga sa pag-alis nilang mag-ina ay wala siyang kahit sinong napagsabihan ng kanyang mga dinadala at kinimkim lamang ang lahat ng iyon.
Humablot si Greg ng ilang piraso ng tissue at iniabot iyon kay Diane. Akma pa sana niyang hahagurin ang likod nito ngunit bumalikwas ulit ang balikat ni Diane upang ilagan ang kamay ni Greg. Napakapit na lang siya sa sandalan ng kumare habang nakalingon dito at patuloy na nakikinig.
“Ang lakas ng loob niyang ipamukha sa’kin na may ginagawa akong mali! Huhuhu… Yun pala–“
Panay ang yugyog ng balikat ni Diane habang nakasubsob sa mga tissue na nasa kanyang palad. Di na napigil ang pagbuhos ng emosyon na pilit niyang itinatago maging sa kanyang mga magulang.
“Hulaan ko… May babae si Dennis? Nahuli mo?”
Hindi kumibo si Diane ngunit nabasa agad ni Greg dito na tama ang kanyang hula. Kilala naman kasi niya ang likas na ugali ng kanyang kumpare kaya’t hindi na rin siya nagulat.
Natigilan naman si Diane sa tanong ni Greg. Kahit parang sasabog ang dibdib sa sama ng loob at gustong-gustong magsumbong sa kumpare ay minabuti niyang hindi na ikwento ang natuklasan niyang namamagitan kay Dennis at Pam.
Masyado nang magulo ang sitwasyon sa kanila pa lamang tatlo. Kung malalaman pa ni Greg na pinakialaman ni Dennis ang anak nito ay baka mas lalo lang maging kumplikado ang mga bagay sa pagitan ng dalawang pamilya.
Nangangamba din siya na baka kung ano pa ang magawa ni Greg kay Dennis. Kahit may pinagdadaanan sila ng mister ay ayaw niya na mapahamak ito.
“Gagong Dencio… di pa rin pala talaga nagbago ang loko.” tatawa-tawang sambit ni Greg at muli itong napasandal sa kanyang upuan.
“Mga bata pa lang kami, madali talagang magsawa yung si Dennis… Laruan, bag, sapatos, kahit anong gamit niya, ako ang taga-salo… Nag-iisang anak na lalaki eh saka may kaya sila kaya sunod ang luho, panay ang pabili.”
Tahimik na nakikinig lamang si Diane sa kwento ni Greg. Hindi na rin naman iyon lingid sa kanya. Hindi man niya naabutang buhay ang mga magulang ng mister ay naikukwento ng mga hipag niya ang ugaling iyon ng kanilang kapatid.
“Ang masaklap, kahit nung nagbinata na kami, ganon din siya sa babae. Madaling magsawa. Komo madaming available na pamalit… Wala, lapitin si gago eh.”
Nagpatuloy ang pagkukwento ni Greg. Kung paano niya itinatago noon si Dennis kapag ayaw nito umuwi dahil may iniiwasang mga babae na pinupuntahan ito maging sa bahay. Kung paano niya pagtakpan ang kaibigan sa mga magulang nito kapag napapadpad ito kung saan-saan dahil sa hilig nito sa babae.
“Kahit kaibigan ko si Dennis, noon pa dismayado ako kung paano lang niya paglaruan ang mga babae. Kung magpalit ng syota yan noon, parang nagpapalit lang ng damit eh. At ang alam ko, wala talaga siyang balak mag-asawa.”
“Pero nagbago na siya eh! Nagbago na siya… akala ko nagbago na siya…” singit ni Diane, pahina ng pahina ang boses sa panlulumo, at muli na naman itong napahagulgol.
“Alam mo ba mare… Unang kita ko pa lang sa’yo nun sa ospital nung naoperahan tuhod ni Dennis, nagkagusto na ako sa’yo… Alam din niya yun… Kaso syempre may sabit na ‘ko hahaha… Si Dennis ang binata kaya siya na ang dumiskarte sa’yo…”
May munting ngiting gumuhit sa labi ni Diane na waring nagpipigil ng tawa sa nadinig habang dinadampian nito ng tissue ang gilid ng mga matang tuloy-tuloy sa pagluha.
“Pero naisip ko no’n… sana wag kang mapasama sa mahabang listahan ng mga babaeng tinikman lang niya… Sana naman kako seryosohin ka na ni Denni…