Previously on Agnas
Isang misteryosong virus ang kumalat sa Pilipinas. Ilang araw lang ang nakalipas at libo libo nang mga tao ang nagka infection. Subalit ang nakakagimbal dito ay nang matuklasan ng marami na ang mga namamatay sa virus ay muling nabubuhay at kumakain ng laman ng tao. Bawat taong makagat ng mga infected ay nagiging katulad nila. Lumipas pa ang mga linggo at lalong lumala ang sitwasyon. Bumagsak ang pamahalaan at naghari ang mga patay sa mundo ng mga buhay.
Isa si Danny sa mga naging survivors ng tinatawag na zombie apocalypse. Sya at ang kanyang grupo ay nanatili sa Camp Aguinaldo sa pamamahala ni Gen Sakay. Namuhay sila ng tahimik at ligtas sa loob ng kampo. Pero ang kaligtasang ito ay pansamantala lamang dahil sa pagiging sakim sa kapangyarihan ni Sen Ramon at pwersahan nyang inagaw ang pamamahala sa kampo. Dumanak ang dugo at marami ang namatay.
Sa kabila nito, nakilala ni Danny ang misteryosang dayuhan na si Elza Walker. Sa tulong ni Elza, napabagsak nila ang paghahari ni Ramon. Nailigtas ang kakarampot na mga tao at nagdesisyon silang pumunta sa Tagaytay sa paniniwalang ang malamig netong panahon ay makakapigil sa kilos ng mga bangkay. Si Danny naman at Elza ay naiwan upang linisan ang kasamaan ni Haring Ramon.
Episode 1
Dead by Daylights
By: Balderic
Anim na buwan ang nakalipas simula nang umalis ang grupo nina Lt Pat Trinidad sa Camp Aguinaldo. Hinde naging madali para sa kanila ang lakbayin ang papunta sa probinsya. Libo-libong infected ang dinaanan nila para lang makalabas ng syudad at hinde naiwasan ang may malagas sa kanilang grupo. Sa katapusan, kakaunti na lamang sila nang maka akyat ng Tagaytay. Umiwas sila sa malalaking bayan at sa isang makahoy na abandonadong resort sila tumira. May kuryente at tubig pa sa simula na tumagal ng halos dalawang buwan. Pero nawala rin ito kalaunan.
Mag iisang buwan na rin silang nahihirapan dahil sa kawalan ng maiinom at mapapaligong tubig. Walang balon sa lugar at ang magiging dagdag na ingay sa pag gawa neto ay posibleng maging problema para sa buhay ng grupo dahil maririnig ito ng mga infected.
Maayos naman ang ginawang perimeter ni Lt Trinidad. May mga pader sa paligid na nilagyan pa nila ng barbwires. Ang mga open area ay ginawan nila ng mga bakod na gawa sa kahoy plywood at yero. Ginamit rin nila ang mga abandonadong mga sasakyan para pangharang sa paligid. May nagmamasid sa bawat sulok ng perimeter na nagpapalit makalipas ang anim na oras.
Sagana naman sila sa pagkain dahil nakagawa pa sila ng gulayan at may maliit na poultry farm sa bandang likod ng resort. May naimbak silang mga feeds para sa mga alagang manok at baboy na posibleng aabot pa ng isa’t kalahating taon.
Regular silang nagsasagawa ng mga raids sa malalapit na bayan. Madaling araw sila kung kumilos at iisang squad lang na kayang protektahan ang grupo. Madali mabilis at maingat ang estilo ng grupo. Sa nakalipas na anim na buwan ay may ilan rin sa kanila ang napatay subalit natuto na rin sila sa mga pagkakamali. Bawat isa sa kanila ay may tig iisang baril na may isang magazine na para lang sa emergency. Binigyan ni Trinidad ng babala ang mga myembro nya na kapag malalagay sa alanganin ay wag mag dalawang isip na barilin na lamang ang sarili para hinde na maranasan ang isang malupig na kamatayan sa mga kamay at ngipin ng mga infected. Ang kanilang primerong sandata ay ang mga itak, crowbars, kutsilyo at iba pang matutulis na bagay. Nasanay na rin sila sa pakikipaglaban sa mga infected at binabalot nila ng makakapal na mga libro o magazines ang kanilang mga braso, mga paa at may suot silang makapal na jacket na may mga nakatahing mga plastik na pwedeng mabend depende sa galaw. May helmet rin sila na may tinahing mga makapal na tela na pinoprotektahan ang leeg nila. Medyo mabigat man at mahirap igalaw, protektado naman sila at mas kampante sa kanilang mga lakad.
Sa isang maliit na gusali sa gilid ng resort, ginamit ito ng grupo na isang klinika. Nagkamalay na at nakarecover si Dr. Andrea de Silva. Sya mismo ang namamahala dito at tumutulong sa may mga sakit. May naimbak silang mga gamot at kagamitan. Malimit mga matatanda ang mga naging pasyente nya.
“Maraming salamat doc Andrea.” Wika ng isang matanda matapos ito bigyan ng gamot.
“Wag nyo hong kakalimutang uminom ng maraming tubig.” Payo naman ni Andrea. Tumango ang matanda bago ito umalis. Isa nanamang pasyente ang pumalit sa upuan.
“Tubig doc? Mukhang mas marami pa tayong makukuhang softdrinks kesa sa maiinom na tubig eh.” Wika naman ni Pablo. Umupo ito katabi ni Andrea. Si Pablo ay isang massage therapist na kasing edad ni Andrea. Ito na lamang ang taong tumutulong sa kanya bilang assistant. Nginitian ni Andrea ang lalake.
“Diabetes naman ang aabutin mo sa sobrang asukal ng softdrinks Pablo.”
“Haha sa panahong ito, puproblemahin mo pa ba ang diabetes?”
“Wala tayong magagawa, halos wala na tayong nakukuhang tubig sa mga karatig bayan.”
“Bakit hinde nalang kasi tumayo ng deep well sa lugar na to, sigurado akong may tubig ring laman ang bundok na to di ba.”
Napa iling si Andrea.
“Makakakuha ka man ng tubig, pero ang ingay na idudulot ng pagbutas sa lupa ay siguradong maririnig ng ilang milya. Para ka na ring manglalako ng balot at sinisigaw mong may dala kang pagkain.”
“Doc! Doc!” tumatakbo ang isang dalaga papasok sa clinic ni Andrea. Sinalubong naman ito ni Pablo.
“Ayesha ba’t para kang hinahabol ng aso? Ano bang nangyari?” tanong ng lalake.
“Mang Pablo, Doc, si Arvin po kasi.”
“Ano nanamang ginawa ni Arvin?” tanong ni Andrea.
“Gusto po kasing sumama kay Sir Pat. May lakad kasi sila ngayon, pupunta daw sila sa water plant sa ibaba. Natatakot po kasi ako eh padalos-dalos ng desisyon si Arvin eh.”
“Pablo puntahan mo nga, samahan mo si Ayesha at kausapin nyo ng matino yang batang yan. Ang laki-laki na pasaway pa rin.”
“Okay Doc. Tara iha.”
Si Ayesha ay isa sa mga natitirang kabataan sa kampo. Simula nang mawalan ito ng mga magulang ay si Andrea na ang nagmistulang ina neto habang si Arvin naman ang fiance ni Ayesha. Ikakasal na sana sila bago pa nagsimula ang pagkalat ng infection pero ngayon ay naudlot ito. Habang nasa puder ni Andrea ang dalawa, si Arvin naman ay patuloy na naghahanap ng bagay na pwede netong maitulong sa kampo at nahihiya itong walang ginagawa.
Nagmamadaling pinuntahan ng dalawa ang pinagtitipunan ng raid team ni Pat. Naabutan nila ang mga ito sa kaisa-isang gate nila na gawa sa yero plywood at mga metal cross wires. Nakita ni Ayesha ang nobyo at nilapitan ito.
“Arvin hinde ka na ba magpapapigil?” tanong ni Ayesha. Sinalubong ni Pat si Pablo.
“Sir Pat, okay lang po bang dalhin nyo ang batang yan? Aba hinde pa sanay yan sa labas. Nag-aalala lang kasi kami baka anong mangyari.” Wika ni Pablo.
“Wag ka mag alala Mang Pablo, ako nang bahala kay Arvin. Matagal na nya akong sinabihan at ilang beses ko na rin syang tinuruang gumamit ng sandata at baril. Sa panahon ngayon, hinde na ako namimili pa ng mga volunteers. Pa-ubos na ang mga supplies natin at kailangan natin maghanap.”
“Kaya ko po sarili ko Mang Pablo.” Sabat naman ni Arvin.
“Arvin naman eh! Ano ka ba! Hinde ka ba natatakot?”
“Babe, ginagawa ko ito para rin sa atin. Hinde na ako bata. Kayang kaya ko na sarili ko at kailangan may gawin rin akong papel sa community natin. Relax ka lang okay.”
“Okay men, ready na kayo? Tayo na!” sigaw ni Pat at binuksan na ang gate.
“Sir Pat kasama kayo?” tanong ni Pablo.
“Trainee ko pa si Arvin. Katulad ni Danny noon na sinanay rin ni Jeric. Si Arvin naman ang tinutulungan ko.”
“Sino hong Jeric?” tanong ni Ayesha. Napangiti lang si Pat. Tinignan ni Ayesha si Pablo at umiling lang ito. Niyakap na lamang ng dalaga ang nobyo bago sila umalis.
Pitong tao kasama si Pat ang lumabas ng kampo. Pakay nila ang pumping station na malapit lang sa kanila. Kapag maisaayos nila ito, magkakaroon na ulit ng tubig sa kanilang mga tubo.
———-
By: Balderic
US Embassy
Lumapag ang isang chopper sa US Embassy. Ang helicopter ay may insignia ng SHARD (SCIENTIFIC HEADQUARTERS OF APPLIED RESEARCH DIVISION). Ang Shard ay isang applied scientific division ng US na syang nangangasiwa ng mga biohazard outbreaks na dulot ng isang posibleng terrorist attack.
Bumaba sa chopper ang dalawang agents neto. Sinalubong sila ng assistant in Chief ng embassy.
“Welcome back you two, have you located the Omega?”
“No sir but we found something else.” Wika ng isang lalake. Naka black glasses ito nakasuot ng black army tactical uniform at ang nakalagay sa name patch nya ay Naval. Katabi nya ang isang dalaga na nakatactical uniform din at ang name patch neto ay Queen.
Pumasok sila sa loob ng embassy building at dumiretso sila sa head office.
“Ah this is Mr Paul Spencer. “ pakilala ng assistant sa Embassy Chief. Nakipagkamay ito sa dalawang panauhin.
“Paul Spencer. I take it you two are the first team from Shard am I right?”
“Jeric Naval sir. How do you do?”
“And I’m Beatrix Queen sir.”
“Have a seat.”
“Mr Spencer, we would like you to see what we found on the streets.” Wika ni Jeric.
Binuksan nya ang isang mini laptop at may ipinakitang mga datos at pictures.
“We tracked down several Brutalists and extracted the Alpha strains but we found at least two of them on different areas, dead.”
“Dead? Who would have killed them? The army?”
“I’m not sure sir. They do have bullet wounds but when I examined the bodies further, they also have traces of physical trauma from blunt objects. Possibly even coming from bare hands.”
“You mean to tell me, someone out there, fought an Alpha strain creature with their bare hands?”
“That’s not all. The damage it took was so devastating that it crushed major body organs inside the creature.”
“So this unknown person killed it? With its hands?”
“I’m not sure but it could be a possibility.”
“Yeah well, this could be a sign that an Omega strain is still in this country. Find that person, take it here no matter the cost. That person is a US property and should not be roaming on the streets. Capture it and bag it kid.”
“Yes sir.”
Lumabas sina Jeric at Bea sa opisina. Huminto sa gilid ng hallway si Jeric at tumingin sa labas ng Embassy. Malalaking glass panels ang ginawang dingding sa hallway at tanaw ni Jeric ang nawasak na syudad ng kalakhang maynila.
“Kuya di ba sabi may Omega strain ka? Bakit di nalang nila kinuha sayo ang strain at yun ang gamitin?”
“Obviously ayaw nilang mapunta sa ibang mga kamay ang virus. Alam mo ba ang magiging presyo neto sa black market?”
“Sabagay, tsaka mukhang naging limitado nalang sa asia ang infection. Pero sa tingin mo, sino kaya ang umatake sa mga brutalists na yun?”
“Hinde ko pa alam. Ang mahalaga ay maayos natin ito sa lalong madaling panahon.”
———-
By: Balderic
Narating ng grupo ni Pat ang water pumping station. Naging maingat ang mga ito sa paglalakbay dahil na rin sa mga nagkakalat na infected. Binasag ni Pat ang salamin ng pinto at inabot ang door knob neto. Binuksan nya at pumasok sila sa loob. Nagkalat ang mga gamit sa loob at napakatahimik. Binuksan ng isa sa kanila ang ilaw pero di ito gumagana.
“Walang kuryente sir Pat. Baka ito dahilan kaya tumigil ang operation neto.”
“Or baka dahil wala nang taong nangangasiwa dito kaya tumigil ito.” Sagot ni Pat.
…